جبیں پر خاک ہے یہ کس کے در کی

جبیں پر خاک ہے یہ کس کے در کی

بلائیں لے رہا ہوں اپنے سر کی

ابھر آئی ہیں پھر چوٹیں جگر کی

سلامت برچھیاں ترچھی نظر کی

قیامت کی حقیقت جانتا ہوں

یہ اک ٹھوکر ہے میرے فتنہ گر کی

کیا مجبور آئین وفا نے

نہ کرنی تھی وفا تم سے مگر کی

نہ مانو گے نہ مانو گے ہماری

ادھر ہو جائے گی دنیا ادھر کی

ہوئی ان بن کسی سے مجھ پہ برسے

بلائیں میرے سر دشمن کے سر کی

نہ تیرے حسن بے پروا کی غایت

نہ کوئی حد مرے ذوق نظر کی

jabin par khak hai ye kis ke dar ki

balaen le raha hun apne sar ki

ubhar ai hain phir choten jigar ki

salamat barchhiyan tirchhi nazar ki

qayamat ki haqiqat janta hun

ye ik thokar hai mere fitna gar ki

kiya majbur ain-e-wafa ne

na karni thi wafa tum se magar ki

na manoge na manoge hamari

idhar ho jaegi duniya idhar ki

hui an ban kisi se mujh pe barse

balaen mere sar dushman ke sar ki

na tere husn-e-be parwa ki ghayat

na koi had mire zauq-e-nazar ki