جب نہ جیتے جی مرے کام آئے گی

جب نہ جیتے جی مرے کام آئے گی

کیا یہ دنیا عاقبت بخشائے گی

جب ملے دو دل مخل پھر کون ہے

بیٹھ جاؤ خود حیا اٹھ جائے گی

گر یہی ہے اس گلستاں کی ہوا

شاخ گل اک روز جھونکا کھائے گی

داغ سودا ایک دن دے گا بہار

فصل اس گل کی شگوفہ لائے گی

کچھ تو ہوگا ہجر میں انجام کار

بے قراری کچھ نہ کچھ ٹھہرائے گی

صندلی رنگوں سے مانا دل ملا

درد سر کی کس کے ماتھے جائے گی

خاکساروں سے جو رکھے گا غبار

او فلک بدلی تری ہو جائے گی

جب کرے گا گرمیاں وہ شعلہ رو

شمع محفل دیکھ کر جل جائے گی

جاں نکل جائے گی تن سے اے نسیمؔ

گل کو بوئے گل ہوا بتلائے گی

jab na jite ji mire kam aegi

kya ye duniya aqibat bakhshaegi

jab mile do dil mukhil phir kaun hai

baith jao khud haya uth jaegi

gar yahi hai is gulistan ki hawa

shakh-e-gul ik roz jhonka khaegi

dagh-e-sauda ek din dega bahar

fasl us gul ki shagufa laegi

kuchh to hoga hijr mein anjam-e-kar

be qarari kuchh na kuchh thahraegi

sandali rangon se mana dil mila

dard-e-sar ki kis ke mathe jaegi

khaksaron se jo rakhega ghubar

o falak badli tiri ho jaegi

jab karega garmiyan wo shola ro

sham-e-mahfil dekh kar jal jaegi

jan nikal jaegi tan se ai nasim

gul ko bu-e-gul hua batlaegi