جب ہوئے تم چمن میں آن کھڑے

جب ہوئے تم چمن میں آن کھڑے

ووہیں ہو گئے گلوں کے کان کھڑے

شکر غم ہے کہ دل کے میداں میں

آہ و نالے کے ہیں نشان کھڑے

بیٹھنے کی نہیں رہی طاقت

ہوویں کیا ہم سے ناتوان کھڑے

اس تلک بال شوق لے پہنچا

رہ گئے در پہ داربان کھڑے

اس کے تیر نگاہ کی دولت

ہیں در دل پہ میہمان کھڑے

بے سبب ہم سے روٹھے جاتے ہو

سن لو ٹک ہو کے مہربان کھڑے

دین و ایمان و جان دینے کو

ہم تو ہیں رو بہ رو ہر آن کھڑے

آج وہ امتحان لے ؔجوشش

ہم بھی ہیں بہر امتحان کھڑے

jab hue tum chaman mein an khare

wohain ho gae gulon ke kan khare

shukr gham hai ke dil ke maidan mein

ah-o-nale ke hain nishan khare

baithne ki nahin rahi taqat

howen kya ham se natawan khare

is talak bal shauq le pahuncha

rah gae dar pe darban khare

us ke tir-e-nigah ki daulat

hain dar-e-dil pe mehman khare

be sabab ham se ruthe jate ho

sun lo tuk ho ke mehrban khare

din-o-iman-o-jan dene ko

ham to hain ru ba ro har an khare

aj wo imtihan le joshish

ham bhi hain bahr imtihan khare