جب سے تیری آنکھ ہم سے پھر گئی

جب سے تیری آنکھ ہم سے پھر گئی

حلقۂ غم میں طبیعت گھر گئی

فوج مژگاں میں میرے خوں کے لیے

چشم کی گردش سے کوڑی پھر گئی

محتسب کی آنکھ پر جب سے چڑھی

دخت رز شیشہ کے دل سے گر گئی

نا توانوں کے لئے طوفان کیا

قطرۂ شبنم میں جوہی تر گئی

ساقیا کوئی بلا تھا محتسب

خیریت گزری جو خم کے سر گئی

مردہ میرا دیکھ کر بولا وہ شوخ

کیوں نسیمؔ اب آنکھ تیری پھر گئی

jab se teri ankh ham se phir gai

halqa-e-gham mein tabiat ghar gai

fauj-e-mizhgan mein mere khun ke liye

chashm ki gardish se kauri phir gai

mohtasib ki ankh par jab se charhi

dukht-e-raz shisha ke dil se gir gai

na tawanon ke liye tufan kya

qatra-e-shabnam mein johi tar gai

saqiya koi bala tha mohtasib

khairiyat guzri jo kham ke sar gai

murda mera dekh kar bola wo shokh

kyun nasim ab ankh teri phir gai