جب سے سنا دہن ترے اے ماہرو نہیں

جب سے سنا دہن ترے اے ماہرو نہیں

سب چپ ہیں اب کسی کی کوئی گفتگو نہیں

نکلے جو قلب سے وہ مری آرزو نہیں

تو مل ہی جائے گر تو میں سمجھوں کہ تو نہیں

آنکھیں لڑا رہے ہو سر بزم غیر سے

اور مجھ سے یہ بیان کہ ہم جنگ جو نہیں

پیدا ہوا ہے ایک کی ضد ایک خلق میں

عزت ہے غیر کی تو مری آبرو نہیں

ٹانکے نہ کھائیں زخمیٔ تیغ نگاہ ناز

کہنے کو ہو کہ جامۂ تن میں رفو نہیں

معشوق کون سا ہے نہ ہو دل میں جس کی یاد

اس مختصر سے باغ میں کس گل کی بو نہیں

یہ حال تیری وعدہ خلافی سے ہو گیا

اب تو قسم بھی کھانے کو مجھ میں لہو نہیں

پیری ہے عاشقی کا مزہ جا چکا رشیدؔ

وہ ہم نہیں وہ دل نہیں وہ آرزو نہیں

jab se suna dahan tire ai mahru nahin

sab chup hain ab kisi ki koi guftugu nahin

nikle jo qalb se wo miri arzu nahin

tu mil hi jae gar to main samjhun ke tu nahin

ankhen lara rahe ho sar-e-bazm-e-ghair se

aur mujh se ye bayan ke ham jang jo nahin

paida hua hai ek ki zid ek khalq mein

izzat hai ghair ki to miri abru nahin

tanke na khaen zakhmi-e-tegh-e-nigah-e-naz

kahne ko ho ke jama-e-tan mein rafu nahin

maashuq kaun sa hai na ho dil mein jis ki yad

is mukhtasar se bagh mein kis gul ki bu nahin

ye hal teri waada khilafi se ho gaya

ab to qasam bhi khane ko mujh mein lahu nahin

piri hai ashiqi ka maza ja chuka rashid

wo ham nahin wo dil nahin wo arzu nahin