جب رونے بیٹھتا ہوں تب کیا کسر رہے ہے

جب رونے بیٹھتا ہوں تب کیا کسر رہے ہے

رومال دو دو دن تک جوں ابر تر رہے ہے

آہ سحر کی میری برچھی کے وسوسے سے

خورشید کے منہ اوپر اکثر سپر رہے ہے

آگہ تو رہیے اس کی طرز رہ و روش سے

آنے میں اس کے لیکن کس کو خبر رہے ہے

ان روزوں اتنی غفلت اچھی نہیں ادھر سے

اب اضطراب ہم کو دو دو پہر رہے ہے

آب حیات کی سی ساری روش ہے اس کی

پر جب وہ اٹھ چلے ہے ایک آدھ مر رہے ہے

تلوار اب لگا ہے بے ڈول پاس رکھنے

خون آج کل کسو کا وہ شوخ کر رہے ہے

در سے کبھو جو آتے دیکھا ہے میں نے اس کو

تب سے ادھر ہی اکثر میری نظر رہے ہے

آخر کہاں تلک ہم اک روز ہو چکیں گے

برسوں سے وعدۂ شب ہر صبح پر رہے ہے

میرؔ اب بہار آئی صحرا میں چل جنوں کر

کوئی بھی فصل گل میں نادان گھر رہے ہے

jab rone baithta hun tab kya kasar rahe hai

rumal do do din tak jun abr-e-tar rahe hai

ah-e-sahar ki meri barchhi ke waswase se

khurshid ke munh upar aksar sipar rahe hai

agah to rahiye us ki tarz-e-rah-o-rawish se

ane mein us ke lekin kis ko khabar rahe hai

in rozon itni ghaflat achchhi nahin idhar se

ab iztirab ham ko do do pahar rahe hai

ab-e-hayat ki si sari rawish hai us ki

par jab wo uth chale hai ek adh mar rahe hai

talwar ab laga hai be dol pas rakhne

khun aj kal kisu ka wo shokh kar rahe hai

dar se kabhu jo ate dekha hai main ne us ko

tab se idhar hi aksar meri nazar rahe hai

akhir kahan talak ham ik roz ho chukenge

barson se waada-e-shab har subh par rahe hai

mir ab bahar ai sahra mein chal junun kar

koi bhi fasl-e-gul mein nadan ghar rahe hai