جب ملیں گے کہ اب ملیں گے آپ

جب ملیں گے کہ اب ملیں گے آپ

نہیں معلوم کب ملیں گے آپ

جائیے جائیے خدا حافظ

دیکھیے بچھڑے کب ملیں گے آپ

حشر میں آپ ہی ملیں گے کیا

ایک سے ایک سب ملیں گے آپ

ہوگا میرے لیے وہ عید کا دن

آپ سے آ کے جب ملیں گے آپ

عہد کے ساتھ یہ بھی ہو ارشاد

کس طرح اور کب ملیں گے آپ

زندگی میں تو مل نہیں سکتے

ہوں گا جب جاں بلب ملیں گے آپ

وعدۂ وصل پر نہ کیوں خوش ہوں

میں نے سمجھا کہ اب ملیں گے آپ

نہیں دنیا میں جب بشیرؔ حزیں

کس طرح اس سے اب ملیں گے آپ

jab milenge ke ab milenge ap

nahin maalum kab milenge ap

jaiye jaiye khuda hafiz

dekhiye bichhre kab milenge ap

hashr mein ap hi milenge kiya

ek se ek sab milenge ap

hoga mere liye wo eid ka din

ap se a ke jab milenge ap

ahd ke sath ye bhi ho irshad

kis tarah aur kab milenge ap

zindagi mein to mil nahin sakte

hunga jab jan balb milenge ap

waada-e-wasl par na kyun khush hun

main ne samjha ke ab milenge ap

nahin duniya mein jab bashir hazin

kis tarah us se ab milenge ap