جب سے دیکھا ہے بنا گوش قمر میں تنکا
میاں داد خاں سیاحجب سے دیکھا ہے بنا گوش قمر میں تنکا
پھانس کی طرح کھٹکتا ہے جگر میں تنکا
نیزہ بازی پہ ہمیں اپنی نہ دھمکا اے ترک
ہم سمجھتے ہیں اسے اپنی نظر میں تنکا
آتش نالۂ بلبل یہ چمن میں بھڑکی
نہ بچا نام کو صیاد کے گھر میں تنکا
خار مژگاں کو نظر بھر کے نہ دیکھا میں نے
پڑ گیا اڑ کے مرے دیدۂ تر میں تنکا
سن کے آمد تری آنکھوں سے اٹھا لیتے ہیں
دیکھتے ہیں جو پڑا راہ گزر میں تنکا
گرد اس بحر صفا کے میں پھرا کرتا ہوں
رہتا ہے گردی میں جس طرح بھنور میں تنکا
آہ سوزاں نے جلائے ترے جنگل سیاحؔ
نام کو بھی نہ رہا ایک شجر میں تنکا
jab se dekha hai bana gosh-e-qamar mein tinka
phans ki tarah khatakta hai jigar mein tinka
neza bazi pe hamen apni na dhamka ai tark
ham samajhte hain use apni nazar mein tinka
atish-e-nala-e-bulbul ye chaman mein bharki
na bacha nam ko sayyad ke ghar mein tinka
khar-e-mizhgan ko nazar bhar ke na dekha main ne
par gaya ur ke mire dida-e-tar mein tinka
sun ke amad tiri ankhon se utha lete hain
dekhte hain jo para rah guzar mein tinka
gard is bahr safa ke main phira karta hun
rahta hai gardi mein jis tarah bhanwar mein tinka
ah-e-sozan ne jalae tire jangal sayyah
nam ko bhi na raha ek shajar mein tinka