جب سے عطا ہوا ہمیں خلعت حیات کا

جب سے عطا ہوا ہمیں خلعت حیات کا

کچھ اور رنگ ڈھنگ ہوا کائنات کا

شیشہ اتار، شکوے کو بالائے طاق رکھ

کیا اعتبار زندگیِ بے ثبات کا

لڑتے ہو جب رقیب سے کرتے ہو مجھ سے صلح

مشتاق یاں نہیں کوئی اس التفات کا

گر تیرے تشنہ کام کو دے خضر مرتے دم

پانی ہو خشک چشمۂ آبِ حیات کا

یاں خار و خس کو بے ادبی سے نہ دیکھنا

ہاں عالمِ شہود ہے آئینہ ذات کا

کہتے ہیں جان، جانتے ہیں بے وفا مجھے

کیا اعتبار ہے انہیں دشمن کی بات کا

واعظ جنوں زدوں سے نہیں باز پرسِ حشر

بس آپ فکر کیجئے اپنی نجات کا

جوشِ سرشکِ خوں کے سبب سے دمِ رقم

نامہ نہیں رہا یہ ورق ہے برات کا

اے مرگ آ ، کہ میری بھی رہ جائے آبرو

رکھا ہے اس نے سوگ عدو کی وفات کا

ایسے کے آگے شیفتہ کیا چل سکے جہاں

احسان ایک عمر رہے، ایک رات کا

jab se ata hua hamen khilat hayat ka

kuchh aur rang dhang hua kainat ka

shisha utar, shikwe ko bala-e-taq-e-rakh

kya etibar-e-zindagi-e-be sabat ka

larte ho jab raqib se karte ho mujh se sulh

mushtaq yan nahin koi is iltifat ka

gar tere tishna kam ko de khizr marte dam

pani ho khushk chashma-e-ab-e-hayat ka

yan khar-o-khas ko be adabi se na dekhna

han alam-e-shuhud hai aina zat ka

kahte hain jan, jante hain be wafa mujhe

kya etibar hai unhen dushman ki bat ka

waiz junun zadon se nahin baz pars-e-hashr

bas ap fikr kijiye apni najat ka

josh-e-sarishk-e-khun ke sabab se dam-e-raqam

nama nahin raha ye waraq hai barat ka

ai marg a, ke meri bhi rah jae abru

rakha hai us ne sog adu ki wafat ka

aise ke age shefta kya chal sake jahan

ehsan ek umr rahe, ek rat ka