اہل دل اہل نظر شام و سحر رویا کیے

اہل دل اہل نظر شام و سحر رویا کیے

درد کے پتلے تھے آخر عمر بھر رویا کیے

حال اہل درد نے ان کو رلایا عمر بھر

جن کو حیرت تھی یہ کیونکر رات بھر رویا کیے

دل کی مجبوری پہ رونے سے جو میں روکا گیا

بے بسی سے دل کے چھالے پھوٹ کر رویا کیے

پاس ناموس محبت نے کچھ ایسا کہہ دیا

سر جھکا کر ہم تو وہ منہ پھیر کر رویا کیے

جن سے ہلچل تھی جہان عاشقی میں میرے بعد

ایسے نالوں کے لیے درد و اثر رویا کیے

ذوق گریہ دل کو تھا جانے وہی اس کا سبب

کیا بتائیں تجھ کو ہم کیوں عمر بھر رویا کیے

ہم نہ کہتے تھے کہ اتنی سختیاں اچھی نہیں

تم نہ بیخودؔ کو مٹا کر عمر بھر رویا کیے

ahl-e-dil ahl-e-nazar sham-o-sahar roya kiye

dard ke putle the akhir umr bhar roya kiye

hal ahl-e-dard ne un ko rulaya umr bhar

jin ko hairat thi ye kyunkar rat bhar roya kiye

dil ki majburi pe rone se jo main roka gaya

be basi se dil ke chhale phut kar roya kiye

pas-e-namus-e-mohabbat ne kuchh aisa kah diya

sar jhuka kar ham to wo munh pher kar roya kiye

jin se halchal thi jahan-e-ashiqi mein mere baad

aise nalon ke liye dard-o-asar roya kiye

zauq-e-girya dil ko tha jane wahi us ka sabab

kya bataen tujh ko ham kyun umr bhar roya kiye

ham na kahte the ke itni sakhtiyan achchhi nahin

tum na bekhud ko mita kar umr bhar roya kiye