جاگا وہاں نصیب عدو کا تمام رات

جاگا وہاں نصیب عدو کا تمام رات

میں بے قراریوں سے نہ سویا تمام رات

میری گلی سے اس کو لگا لے گیا رقیب

میں دیکھتا ہی رہ گیا رستہ تمام رات

تھا بزم غیر میں جو وہاں شغل دور جام

درد جگر کا تھا یہاں دورا تمام رات

مدت ہوئی کہ خواب سے واقف نہیں ہے آنکھ

رہتا ہے زلف یار کا سودا تمام رات

پایا نہ تیرگیٔ شب ہجر میں پتا

مجھ کو اجل نے خوب ہی ڈھونڈا تمام رات

دم بھر بھی میرے دل نے نہ سونے دیا اسے

رویا کیا یہ ہجر کا دھڑکا تمام رات

سوہان روح تھا شب وعدہ میں انتظار

لیکن وہ حیلہ جو نہیں آیا تمام رات

یہ حسن یار نے کیا حیراں شب وصال

تکتا ہی رہ گیا رخ زیبا تمام رات

میرا خیال ہجر کی شب وصل بن گیا

پیش نگاہ یار کو رکھا تمام رات

اکبرؔ شب فراق میں جاگے مرے نصیب

میں نے اسی کو خواب میں دیکھا تمام رات

jaga wahan nasib adu ka tamam rat

main be qarariyon se na soya tamam rat

meri gali se us ko laga le gaya raqib

main dekhta hi rah gaya rasta tamam rat

tha bazm-e-ghair mein jo wahan shaghl daur-e-jam

dard-e-jigar ka tha yahan dora tamam rat

muddat hui ke khwab se waqif nahin hai ankh

rahta hai zulf-e-yar ka sauda tamam rat

paya na tirgi-e-shab-e-hijr mein pata

mujh ko ajal ne khub hi dhunda tamam rat

dam bhar bhi mere dil ne na sone diya use

roya kya ye hijr ka dharka tamam rat

sohan ruh tha shab-e-waada mein intizar

lekin wo hila jo nahin aya tamam rat

ye husn-e-yar ne kiya hairan shab-e-wisal

takta hi rah gaya rukh-e-zeba tamam rat

mera khayal-e-hijr ki shab wasl ban gaya

pesh-e-nigah-e-yar ko rakha tamam rat

akbar shab-e-firaq mein jage mire nasib

main ne usi ko khwab mein dekha tamam rat