جب تک غم جہاں کے حوالے ہوئے نہیں

جب تک غم جہاں کے حوالے ہوئے نہیں

ہم زندگی کے جاننے والے ہوئے نہیں

کہتا ہے آفتاب ذرا دیکھنا کہ ہم

ڈوبے تھے گہری رات میں کالے ہوئے نہیں

چلتے ہو سینہ تان کے دھرتی پہ کس لیے

تم آسماں تو سر پہ سنبھالے ہوئے نہیں

انمول وہ گہر ہیں جہاں کی نگاہ میں

دریا کی جو تہوں سے نکالے ہوئے نہیں

طے کی ہے ہم نے صورت مہتاب راہ شب

طول سفر سے پاؤں میں چھالے ہوئے نہیں

ڈس لیں تو ان کے زہر کا آسان ہے اتار

یہ سانپ آستین کے پالے ہوئے نہیں

تیشے کا کام ریشۂ گل سے لیا شکیبؔ

ہم سے پہاڑ کاٹنے والے ہوئے نہیں

jab tak gham jahan ke hawale hue nahin

ham zindagi ke janne wale hue nahin

kahta hai aftab zara dekhna ke ham

dube the gahri rat mein kale hue nahin

chalte ho sina tan ke dharti pe kis liye

tum asman to sar pe sambhale hue nahin

anmol wo guhar hain jahan ki nigah mein

dariya ki jo tahon se nikale hue nahin

tai ki hai ham ne surat-e-mahtab rah-e-shab

tul-e-safar se paon mein chhale hue nahin

das len to un ke zahr ka asan hai utar

ye sanp astin ke pale hue nahin

teshe ka kam resha-e-gul se liya shakeb

ham se pahar katne wale hue nahin