جاں اپنی وقف زحمت ہجراں کئے ہوئے

جاں اپنی وقف زحمت ہجراں کئے ہوئے

عاشق ہر اک بلا کو ہیں مہماں کئے ہوئے

سب منتشر ہیں میرے جنازے کو دیکھ کر

تم ساتھ ہو جو حال پریشاں کئے ہوئے

اب تو نفس کی آمد و شد بھی ہوئی ہے بند

ایسی جگہ ہے سینے میں پیکاں کئے ہوئے

کس واسطے یہ محویت آئینہ دیکھ کر

کیوں آپ اک جہاں کو ہیں حیراں کئے ہوئے

ہنگام احتزار ہے اے دم ذرا ٹھہر

اس وقت ہوں تصور جاناں کئے ہوئے

ان مشکلوں پہ سب کی تن آسانیاں فدا

جن کو تری نگاہ ہو آساں کئے ہوئے

مجمع کا خوف روز قیامت ہے ناصریؔ

بیکار ہو وصال کا ارماں کئے ہوئے

jan apni waqf-e-zahmat-e-hijran kiye hue

ashiq har ik bala ko hain mehman kiye hue

sab muntashir hain mere janaze ko dekh kar

tum sath ho jo hal-e-pareshan kiye hue

ab to nafas ki amad-o-shud bhi hui hai band

aisi jagah hai sine mein paikan kiye hue

kis waste ye mahwiyyat aina dekh kar

kyun ap ik jahan ko hain hairan kiye hue

hangam-e-ahtazar hai ai dam zara thahar

is waqt hun tasawwur janan kiye hue

in mushkilon pe sab ki tan asaniyan fida

jin ko tiri nigah ho asan kiye hue

majmaa ka khauf roz-e-qayamat hai nasiri

bekar ho wisal ka arman kiye hue