جب برق پاش جلوۂ جانانہ بن گیا

جب برق پاش جلوۂ جانانہ بن گیا

فرزانہ تھا وہی کہ جو دیوانہ بن گیا

شوق نمود نے اسے رکھا نہ عرش پر

کعبہ کہیں بنا کہیں بت خانہ بن گیا

افتاد گئی قلب کا اللہ رے عروج

محفل میں اس کی ٹوٹ کے پیمانہ بن گیا

تکمیل عشق حسن کو بیتاب کر گئی

خود ساز شمع سوزش پروانہ بن گیا

اس دل نے اتنی کی ہے یگانوں کی جستجو

اپنی نظر میں آپ ہی بیگانہ بن گیا

تصویر انتظار بنا شوق دل تو کیا

کمبخت اس کا وعدۂ ایفا نہ بن گیا

ہنگامۂ نزول تمنائے دل نہ پوچھ

آباد ہو کے نازش ویرانہ بن گیا

جو نالہ آج تک نہ ہوا لب سے آشنا

دنیا میں کیوں منیرؔ وہ افسانہ بن گیا

jab barq pash jalwa-e-janana ban gaya

farzana tha wahi ke jo diwana ban gaya

shauq-e-numud ne use rakha na arsh par

kaaba kahin bana kahin but khana ban gaya

uftad gai qalb ka allah re uruj

mahfil mein us ki tut ke paimana ban gaya

takmil-e-ishq-e-husn ko betab kar gai

khud saz-e-shama sozish-e-parwana ban gaya

is dil ne itni ki hai yaganon ki justuju

apni nazar mein ap hi begana ban gaya

taswir intizar bana shauq-e-dil to kya

kambakht us ka waada-e-ifa na ban gaya

hangama-e-nuzul-e-tamanna-e-dil na puchh

abad ho ke nazish-e-wirana ban gaya

jo nala aj tak na hua lab se ashna

duniya mein kyun munir wo afsana ban gaya