جب تک اپنے دل میں ان کا غم رہا

جب تک اپنے دل میں ان کا غم رہا

حسرتوں کا رات دن ماتم رہا

ہجر میں دل کا نہ تھا ساتھی کوئی

درد اٹھ اٹھ کر شریک غم رہا

کر کے دفن اپنے پرائے چل دیے

بیکسی کا قبر پر ماتم رہا

سیکڑوں سر تن سے کر ڈالے جدا

ان کے خنجر کا وہی دم خم رہا

آج اک شور قیامت تھا بپا

تیرے کشتو کا عجب عالم رہا

حسرتیں مل مل کے روتیں یاس سے

یوں دل مرحوم کا ماتم رہا

لے گیا تا کوئے یار احسنؔ وہی

مدعی کب دوستوں سے کم رہا

jab tak apne dil mein un ka gham raha

hasraton ka rat din matam raha

hijr mein dil ka na tha sathi koi

dard uth uth kar sharik-e-gham raha

kar ke dafn apne parae chal diye

bekasi ka qabr par matam raha

saikron sar tan se kar dale juda

un ke khanjar ka wahi dam kham raha

aj ik shor-e-qayamat tha bapa

tere kishto ka ajab alam raha

hasraten mil mil ke rotin yas se

yun dil-e-marhum ka matam raha

le gaya ta ku-e-yar ahsan wahi

muddai kab doston se kam raha