جب تلک چرب نہ جوں شمع زباں کیجئے گا

جب تلک چرب نہ جوں شمع زباں کیجئے گا

سرگزشت اپنی کا کیا خاک بیاں کیجئے گا

برق ساں ہنس کے جو وا آپ دہاں کیجئے گا

معنی مخزن اسرار عیاں کیجئے گا

دل کو جب مائل چشمان بتاں کیجئے گا

طرفۃ العین میں سیر دو جہاں کیجئے گا

دل صد پارہ مرا شیشۂ بشکستہ ہے

اس کو پامال ذرا دیکھ کے ہاں کیجئے گا

دل پر آبلہ لایا ہوں دکھانے تم کو

بند اے شیشہ گرو! اپنی دکاں کیجئے گا

کیوں لگاتے ہو مرے سینۂ صد چاک کو ہاتھ

چشم سوزن سے نظر بخیہ گراں کیجئے گا

تم کو اپنا دل پر داغ دکھاتے جو کبھی

سیر گلشن نہ پھر اے لالہ رخاں کیجئے گا

ہاتھ سے محتسب دہر کے اک دن برپا

سر پہ شیشے کے خرابی نہ یہاں کیجئے گا

آبرو مد نظر ہم کو ہے تیری یاں تک

اشک کو روکیے گا ضبط فغاں کیجئے گا

کیونکہ نرگس تری آنکھوں سے کرے ہم چشمی

جب تک اس کا نہ علاج یرقاں کیجئے گا

روکشی دیکھ نہ کر گوشہ نشینوں سے فلک

ہر طرح سے تری خاطر پئے شاں کیجئے گا

ناوک آہ لگائیں گے پیاپے تجھ پر

قد خم گشتہ کو جب اپنے کماں کیجئے گا

ابر نیساں کی بھی جھڑ جائے گی پل میں شیخی

دیدۂ تر کو اگر اشک فشاں کیجئے گا

دل میں کچھ یہ نہ سمجھنا کہ ہمارا ہے دور

جامہ داری میں شک اے بادہ کشاں کیجئے گا

دل میں رکھتے ہو خیال اس کی کمر کا جو نصیرؔ

لا مکاں میں کہیں کیا جا کے مکاں کیجئے گا

jab talak charb na jun shama zaban kijiye ga

sarguzasht apni ka kya khak bayan kijiye ga

barq san hans ke jo wa ap dahan kijiye ga

maani-e-makhzan-e-asrar ayan kijiye ga

dil ko jab mail-e-chashman butan kijiye ga

tarfat alain mein sair-e-do jahan kijiye ga

dil-e-sad para mira shisha-e-bashkasta hai

us ko pamal zara dekh ke han kijiye ga

dil par abla laya hun dikhane tum ko

band ai shisha giro! apni dukan kijiye ga

kyun lagate ho mire sina-e-sad chak ko hath

chashm-e-sozan se nazar bakhiya giran kijiye ga

tum ko apna dil par dagh dikhate jo kabhi

sair-e-gulshan na phir ai lala rukhan kijiye ga

hath se mohtasib-e-dahr ke ik din barpa

sar pe shishe ke kharabi na yahan kijiye ga

abru mad-e-nazar ham ko hai teri yan tak

ashk ko rokiyega zabt-e-fughan kijiye ga

kyunke nargis tiri ankhon se kare ham chashmi

jab tak us ka na ilaj-e-yarqan kijiye ga

rukashi dekh na kar gosha nashinon se falak

har tarah se tiri khatir piye shan kijiye ga

nawak-e-ah lagaenge payapai tujh par

qad-e-kham gashta ko jab apne kaman kijiye ga

abr-e-naisan ki bhi jhar jaegi pal mein shekhi

dida-e-tar ko agar ashk fishan kijiye ga

dil mein kuchh ye na samajhna ke hamara hai dur

jama dari mein shak ai bada kashan kijiye ga

dil mein rakhte ho khayal us ki kamar ka jo nasir

la makan mein kahen kya ja ke makan kijiye ga