جاں بخش لب کے عشق میں ایذا اٹھائیے

جاں بخش لب کے عشق میں ایذا اٹھائیے

بیمار ہو کے ناز مسیحا اٹھائیے

قدسی نگاہ لطف کے امیدوار ہیں

آنکھیں تو سوئے عالم بالا اٹھائیے

اب کے بہار میں جو ہمیں لے چلے جنوں

چن چن کے داغ لالۂ صحرا اٹھائیے

خامہ سے کام لیجئے ہنگام فکر شعر

میدان کارزار میں گھوڑا اٹھائیے

دکھلائے حسن یار کا جلوہ ہمیں جو عشق

کس کس طرح سے لطف تماشا اٹھائیے

تجھ سا حسیں ہو یار تو کیوں کر نہ اس کے پھر

ناز بجا و غمزۂ بے جا اٹھائیے

مفلس ہوں لاکھ پر یہی دل کو بندھی ہے دھن

یوسف کو قرض لے کے تقاضا اٹھائیے

فصل بہار آئی پیو صوفیو شراب

بس ہو چکی نماز مصلیٰ اٹھائیے

جام شراب ناب ہے ساقی لیے کھڑا

گردن تو مثل گردن مینا اٹھائیے

آواز کو سنا کے کئے کان مستفیض

رحم آنکھوں پر بھی کیجئے پردا اٹھائیے

جوش جنوں میں دیکھیے پیچھے نہ مڑ کے پھر

منہ جس طرف کو صورت دریا اٹھائیے

شمشیر زن ہو یار بہادر جوان ہو

آتشؔ جہاد عشق پہ بیڑا اٹھائیے

jan bakhsh lab ke ishq mein iza uthaiye

bimar ho ke naz masiha uthaiye

qudsi nigah-e-lutf ke umidwar hain

ankhen to su-e-alam-e-bala uthaiye

ab ke bahar mein jo hamen le chale junun

chun chun ke dagh-e-lala-e-sahra uthaiye

khama se kam lijiye hangam-e-fikr-e-sher

maidan-e-karzar mein ghora uthaiye

dikhlae husn-e-yar ka jalwa hamen jo ishq

kis kis tarah se lutf-e-tamasha uthaiye

tujh sa hasin ho yar to kyun kar na us ke phir

naz-e-baja-o-ghamza-e-be ja uthaiye

muflis hun lakh par yahi dil ko bandhi hai dhun

yusuf ko qarz le ke taqaza uthaiye

fasl-e-bahar ai piyo sufiyo sharab

bas ho chuki namaz musalli uthaiye

jam-e-sharab-e-nab hai saqi liye khara

gardan to misl-e-gardan-e-mina uthaiye

awaz ko suna ke kiye kan mustafiz

rahm ankhon par bhi kijiye parda uthaiye

josh-e-junun mein dekhiye pichhe na mur ke phir

munh jis taraf ko surat-e-dariya uthaiye

shamshir zan ho yar bahadur jawan ho

atish jihad ishq pe bera uthaiye