ایسی ہوئی سرسبز شکایت کی کڑی بات

ایسی ہوئی سرسبز شکایت کی کڑی بات

سبزے کی طرح کان میں اس گل کی پڑی بات

کیوں کر دہن تنگ سے ظاہر ہو کڑی بات

منہ آپ کا چھوٹا ہے نہ نکلے گی بڑی بات

گل رنگ ترے ہونٹھ ہوے بار سخن سے

اے جان اڑا لے گئی مسی کی دھڑی بات

تیرے سخن سخت میں ہے حسن نزاکت

کانوں کو ہوئی پنبۂ مہتاب کڑی بات

اس پیچ سے تم مجھ کو اڑاتے ہو دم نطق

زنجیر رم ہوش کی بنتی ہے کڑی بات

تقریر تری شاخ گل تازہ ہے اے مست

دیتی ہے کف بادہ میں پھولوں کی چھڑی بات

وصف در دنداں سے یہ بڑھ جاتے ہیں رتبے

رگ رگ کو بنا دیتی ہے موتی کی لڑی بات

ہر کان ہوا ہے سبد گل سے زیادہ

کیا پھول کے مانند ترے منہ سے جھڑی بات

دھوتا ہے سخن دل سے غبار غم دنیا

ہے گرد الم کے لئے ساون کی جھڑی بات

کیا مہر بنائی ترے یاقوت سخن کی

مانند نگیں ہم نے انگوٹھی میں جڑی بات

نقد سخن پاک دیا گرد قلق میں

گنجینہ کے مانند تہ خاک گڑی بات

جس روز میں گنتا ہوں ترے آنے کی گھڑیاں

سورج کو بنا دیتی ہے سونے کی گھڑی بات

استاد کے احسان کا کر شکر منیرؔ آج

کی اہل سخن نے تری تعریف بڑی بات

aisi hui sarsabz shikayat ki kari bat

sabze ki tarah kan mein us gul ki pari bat

kyun kar dahan-e-tang se zahir ho kari bat

munh ap ka chhota hai na niklegi bari bat

gul rang tire honth hue bar-e-sukhan se

ai jan ura le gai missi ki dhari bat

tere sukhan-e-sakht mein hai husn-e-nazakat

kanon ko hui pumba-e-mahtab kari bat

is pech se tum mujh ko urate ho dam nutq

zanjir-e-ram hosh ki banti hai kari bat

taqrir tiri shakh-e-gul-e-taza hai ai mast

deti hai kaf-e-bada mein phulon ki chhiri bat

wasf-e-dar dandan se ye barh jate hain rutbe

rag rag ko bana deti hai moti ki lari bat

har kan hua hai sabd-e-gul se ziyada

kya phul ke manind tire munh se jhari bat

dhota hai sukhan dil se ghubar-e-gham duniya

hai gard alam ke liye sawan ki jhari bat

kya mehr banai tire yaqut sukhan ki

manind-e-nagin ham ne anguthi mein juri bat

naqd-e-sukhan pak diya gard qalaq mein

ganjina ke manind-e-tah khak guri bat

jis roz mein ginta hun tire ane ki ghariyan

suraj ko bana deti hai sone ki ghari bat

ustad ke ehsan ka kar shukr munir aj

ki ahl-e-sukhan ne tiri taarif bari bat