تڑپ کے رات بسر کی جو اک مہم سر کی

تڑپ کے رات بسر کی جو اک مہم سر کی

چھری تھی میرے لیے جو شکن تھی بستر کی

عرق عرق ہیں جو گرمی سے روز محشر کی

پناہ ڈھونڈتے ہیں میرے دامن تر کی

ہوا گمان اسی شوخ سست پیماں کا

اگر ہوا سے بھی زنجیر ہل گئی در کی

اسی طرف ترے قرباں نگاہ شرم آلود

مجھی پہ تیز ہو یہ باڑھ کند خنجر کی

خرام وہ جو ہلا دے جگر فرشتوں کا

نگاہ وہ جو الٹ دے صفوں کو محشر کی

سجائی حضرت واعظ نے کس تکلف سے

متاع زہد و ورع سیڑھیوں پہ منبر کی

عبور بحر حقیقت سے جب نہیں ممکن

کنارے بیٹھ کے لہریں گنوں سمندر کی

سنے گا کون سنی جائے گی صفیؔ کس سے

تمہاری رام کہانی یہ زندگی بھر کی

tarap ke rat basar ki jo ik muhim sar ki

chhuri thi mere liye jo shikan thi bistar ki

araq araq hain jo garmi se roz-e-mahshar ki

panah dhundte hain mere daman-e-tar ki

hawa guman usi shokh-e-sust paiman ka

agar hawa se bhi zanjir hal gai dar ki

isi taraf tire qurban nigah-e-sharm alud

mujhi pe tez ho ye barh kand khanjar ki

khiram wo jo hila de jigar farishton ka

nigah wo jo ulat de safon ko mahshar ki

sajai hazrat-e-waiz ne kis takalluf se

mata-e-zohd-o-waraa sirhiyon pe mimbar ki

ubur bahr haqiqat se jab nahin mumkin

kinare baith ke lahren ginun samundar ki

sunega kaun suni jaegi safi kis se

tumhari ram kahani ye zindagi bhar ki