تھک گئے تم حسرت ذوق شہادت کم نہیں

تھک گئے تم حسرت ذوق شہادت کم نہیں

مجھ سے دم لے لو اگر تیغ ستم میں دم نہیں

دردمندان ازل رکھتے نہیں درماں کا غم

سینۂ صد چاک گل منت کش مرہم نہیں

روز مرتے ہیں ہزاروں دیکھ کر نیرنگ حسن

گر یہی عالم تمہارا ہے تو یہ عالم نہیں

مر مٹے ہم عشق کے شہرے وہی ہیں چار سو

شور رسوائی پس مردن بھی اپنا کم نہیں

نالۂ آتش فشاں یوں ہی اگر ہے اوج پر

تو نہیں اے آسمان فتنہ گر یا ہم نہیں

بے ثباتی پر بہار باغ کی روتا ہے چرخ

روئے گل پر قطرہ ہائے اشک ہیں شبنم نہیں

خوش ہیں میرے مرنے سے تسلیمؔ خویش و اقربا

خانۂ شادی ہے گویا خانۂ ماتم نہیں

thak gae tum hasrat-e-zauq-e-shahadat kam nahin

mujh se dam le lo agar tegh-e-sitam mein dam nahin

dardmandan azal rakhte nahin darman ka gham

sina-e-sad chak-e-gul minnat kash-e-marham nahin

roz marte hain hazaron dekh kar nairang-e-husn

gar yahi alam tumhara hai to ye alam nahin

mar mite ham ishq ke shohre wahi hain char su

shor-e-ruswai pas murdan bhi apna kam nahin

nala-e-atish fishan yun hi agar hai auj par

to nahin ai asman-e-fitna gar ya ham nahin

be sabati pur bahar-e-bagh ki rota hai charkh

ru-e-gul par qatra ha-e-ashk hain shabnam nahin

khush hain mere marne se taslim khwesh-o-aqriba

khana-e-shadi hai goya khana-e-matam nahin