تھا نجم بخت تیرہ مقابل تمام رات — میر کلو عرش

Arooz is now on the App Store, for iPhone and iPad. Download →

میر کلو عرش

تھا نجم بخت تیرہ مقابل تمام رات

آنکھوں تلے پھرا مرے قاتل تمام رات

ہاروت ساں ذقن میں رہا دل تمام رات

گزری میانۂ چہ بابل تمام رات

کس گل نے گل کیا تھا مری شمع گور کو

تھا قبر پر ہجوم عنادل تمام رات

دھبہ لگے نہ رنگ سفید و سیاہ میں

ہے گو تمام دن کے مقابل تمام رات

روشن تھی صبح تک مرے مدفن پہ شمع طور

رویا کھڑے کھڑے مرا قاتل تمام رات

اے رشک مہر و مہ ترے منہ پر نثار ہے

سورج تمام دن مہ کامل تمام رات

جاتی تھی یاد گیسو و رخ میں فلک پہ آہ

مہتاب تھا اسیر سلاسل تمام رات

کرتے ہیں گل جو چاک گریباں تمام دن

سنتے ہیں نالہ ہائے عنادل تمام رات

کہتا تھا عرشؔ سچ میں سمجھتا تھا جھوٹ یار

کرتا رہا ہے حق کو وہ باطل تمام رات