توبہ کا پاس رند مے آشام ہو چکا

توبہ کا پاس رند مے آشام ہو چکا

بس ہو چکا تقدس اسلام ہو چکا

شمع حرم تھا گاہ گہے دیر کا چراغ

میں زیب کفر و رونق اسلام ہو چکا

کوٹھے پہ چلئے لطف شب ماہ دیکھیے

سب چاندنی کا فرش لب بام ہو چکا

دیں دار برہمن کہے کافر بتائے شیخ

دونوں طرف سے مورد الزام ہو چکا

اکثر مشاعرے پہ ہوا بزم غم کا شک

کیا کیا مرے کلام پہ کہرام ہو چکا

قرآں اٹھاتے ہیں طمع زر کے واسطے

دیں دار اگر یہی ہیں تو اسلام ہو چکا

کعبے کو جاتے جاتے پھرے سوئے دیر رندؔ

لو حج کر آئے آپ اور احرام ہو چکا

tauba ka pas rind-e-mai asham ho chuka

bas ho chuka taqaddus-e-islam ho chuka

sham-e-haram tha gah gahe der ka charagh

main zeb kufr-o-raunaq-e-islam ho chuka

kothe pe chaliye lutf-e-shab-e-mah dekhiye

sab chandni ka farsh lab-e-bam ho chuka

den dar-e-barahman kahe kafir batae shaikh

donon taraf se morid-e-ilzam ho chuka

aksar mushaare pe hua bazm-e-gham ka shak

kya kya mire kalam pe kohram ho chuka

quran uthate hain tama-e-zar ke waste

den dar agar yahi hain to islam ho chuka

kaabe ko jate jate phire su-e-dair rind

lo haj kar ae ap aur ehram ho chuka