توڑ کر تار نگہ کا سلسلہ جاتا رہا

توڑ کر تار نگہ کا سلسلہ جاتا رہا

خاک ڈال آنکھوں میں میری قافلہ جاتا رہا

کون سے دن ہاتھ میں آیا مرے دامان یار

کب زمین و آسماں کا فاصلہ جاتا رہا

خار صحرا پر کسی نے تہمت دزدی نہ کی

پاؤں کا مجنوں کے کیا کیا آبلہ جاتا رہا

دوستوں سے اس قدر صدمے اٹھائے جان پر

دل سے دشمن کی عداوت کا گلہ جاتا رہا

جب اٹھایا پاؤں آتشؔ مثل آواز جرس

کوسوں پیچھے چھوڑ کر میں قافلہ جاتا رہا

tor kar tar-e-nigah ka silsila jata raha

khak dal ankhon mein meri qafila jata raha

kaun se din hath mein aya mire daman-e-yar

kab zamin-o-asman ka fasla jata raha

khar-e-sahra par kisi ne tohmat duzdi na ki

paon ka majnun ke kya kya abla jata raha

doston se is qadar sadme uthae jan par

dil se dushman ki adawat ka gila jata raha

jab uthaya paon atish misl-e-awaz-e-jaras

koson pichhe chhor kar main qafila jata raha