تیر نظر نے ظلم کو احساں بنا دیا

تیر نظر نے ظلم کو احساں بنا دیا

ترکیب دل نے درد کو درماں بنا دیا

صد شکر آج ہو گئی تکمیل عشق کی

اپنے کو خاک کوچۂ جاناں بنا دیا

کوتاہی کوئی دست جنوں سے نہیں ہوئی

دامن کو ہم کنار گریباں بنا دیا

چھوڑی ہے جب سے میں نے سلامت روی کی چال

دشواریوں کو راہ کی آساں بنا دیا

اے مشعل امید یہ احسان کم نہیں

تاریک شب کو تو نے درخشاں بنا دیا

حسن آفریں ہوا ہے تصور جمال کا

دل کو ہوائے گل نے گلستاں بنا دیا

زہد اور اتقا پہ مجھے اپنے ناز تھا

خود میں نے تجھ کو دشمن ایماں بنا دیا

آئینۂ جمال کو دیکھوں گا کس طرح

اس نے تو پہلے ہی مجھے حیراں بنا دیا

وہ امتیاز حسن ہے معنی و لفظ کا

وحشتؔ کو جس نے غالبؔ دوراں بنا دیا

tir-e-nazar ne zulm ko ehsan bana diya

tarkib-e-dil ne dard ko darman bana diya

sad shukr aj ho gai takmil-e-ishq ki

apne ko khak kucha-e-janan bana diya

kotahi koi dast-e-junun se nahin hui

daman ko ham kanar gareban bana diya

chhori hai jab se main ne salamat rawi ki chal

dushwariyon ko rah ki asan bana diya

ai mashal-e-umid ye ehsan kam nahin

tarik shab ko tu ne darakhshan bana diya

husn afrin hua hai tasawwur jamal ka

dil ko hawa-e-gul ne gulistan bana diya

zohd aur ittiqa pe mujhe apne naz tha

khud main ne tujh ko dushman-e-iman bana diya

aina-e-jamal ko dekhunga kis tarah

us ne to pahle hi mujhe hairan bana diya

wo imtiyaz-e-husn hai maani-o-lafz ka

wahshat ko jis ne ghalib-e-dauran bana diya