تیری جو یاد اے دل خواہ بھولا

تیری جو یاد اے دل خواہ بھولا

باللہ بھولا واللہ بھولا

فرقت کی شب میں جاں سوز دل نے

اف اف کیا جو آہ آہ بھولا

کج رکھ نہ پا کو جا دل سے غافل

پھیر اس نے کھایا جو راہ بھولا

زنار ڈالا تسبیح پھیکی

عشق صنم میں اللہ بھولا

خور نے گرایا اس کو نظر سے

جو ذرہ تیری درگاہ بھولا

زلف رسا کو سمجھا جو افعی

چوکا وہ قصر کوتاہ بھولا

دیکھے سے تیرا روئے منور

ہم مہر بھولا ہم ماہ بھولا

محروم رکھا ساقی نے ہم کو

اپنے گدا کو جم جاہ بھولا

بت خانہ چھوڑا باز آئے بت سے

وہ شہر بھولا وہ شاہ بھولا

شرط وفا کی کس بے وفا سے

آتشؔ سا عارف آگاہ بھولا

teri jo yad ai dil khwah bhula

balla bhula wallah bhula

furqat ki shab mein jan soz-e-dil ne

uf uf kya jo ah ah bhula

kaj rakh na pa ko ja dil se ghafil

pher us ne khaya jo rah bhula

zunnar dala tasbih phiki

ishq sanam mein allah bhula

khur ne giraya us ko nazar se

jo zarra teri dargah bhula

zulf-e-rasa ko samjha jo afi

choka wo qasr-e-kotah bhula

dekhe se tera ru-e-munawwar

ham mehr bhula ham mah bhula

mahrum rakha saqi ne ham ko

apne gada ko jam jah bhula

but khana chhora baz ae but se

wo shahr bhula wo shah bhula

shart-e-wafa ki kis be wafa se

atish sa arif agah bhula