تنہا

میں وہی قطرۂ بے بحر وہی دشت نورد

اپنے کاندھوں پہ اٹھائے ہوئے صحرا کا طلسم

اپنے سینے میں چھپائے ہوئے سیلاب کا درد

ٹوٹ کر رشتۂ تسبیح سے آ نکلا ہوں

دل کی دھڑکن میں دبائے ہوئے اعمال کی فرد

میرے دامن میں برستے ہوئے لمحوں کا خروش

میری پلکوں پہ بگولوں کی اڑائی ہوئی گرد

لاکھ لہروں سے اٹھا ہے مری فطرت کا خمیر

لاکھ قلزم مرے سینے میں دواں رہتے ہیں

دن کو کرنیں مرے افکار کا منہ دھوتی ہیں

شب کو تارے مری جانب نگراں رہتے ہیں

میرے ماتھے پہ جھلکتا ہے ندامت بن کر

ابن مریم کا وہ جلوہ جو کلیسا میں نہیں

راندۂ موج بھی ہیں مجرم ذرات بھی ہیں

میرا قصہ کسی افسانۂ دریا میں نہیں

میری تاریخ کسی صفحۂ صحرا میں نہیں

main wahi qatra-e-be bahr wahi dasht-e-naward

apne kandhon pe uthae hue sahra ka tilism

apne sine mein chhupae hue sailab ka dard

tut kar rishta-e-tasbih se a nikla hun

dil ki dharkan mein dabae hue aamal ki fard

mere daman mein baraste hue lamhon ka kharosh

meri palkon pe bagulon ki urai hui gard

lakh lahron se utha hai miri fitrat ka khamir

lakh qulzum mire sine mein dawan rahte hain

din ko kirnen mire afkar ka munh dhoti hain

shab ko tare miri janib nigaran rahte hain

mere mathe pe jhalakta hai nadamat ban kar

ibn-e-maryam ka wo jalwa jo kalisa mein nahin

randa-e-mauj bhi hain mujrim-e-zarrat bhi hain

mera qissa kisi afsana-e-dariya mein nahin

meri tarikh kisi safha-e-sahra mein nahin