تو آج آئینہ رو مجھ پاس آ جا — عبدالرحمان احسان دہلوی

Arooz is now on the App Store, for iPhone and iPad. Download →

عبدالرحمان احسان دہلوی

تو آج آئینہ رو مجھ پاس آ جا

بہر صورت مجھے صورت دکھا جا

تو آ اے آتش برق غم یار

مرا یہ خرمن ہستی جلا جا

مری آتی ہے بس نیند آئے تو آپ

یہ اپنی چشم پوشی دیکھتا جا

مری جاری ہیں آنسو آہ قاصد

شتابی کہہ یہ اس کو ماجرا جا

لکھا میں نے یہ اس یوسف کو کل خط

عزیزا دلبرا نازک مزاجا

رکھی ہے چاہ تیری آہ بیتاب

قلق اس میرے دل کا تو مٹا جا

خدا ہی ہے مری کشتی کا حافظ

خدا کے واسطے تو ناخدا جا

نہ سنوا غیر کی باتیں سن اے یار

ترے جو جی میں آوے تو سنا جا

وہی ہے جا بجا بے جا نہیں یہ

بجا ہے اس کی ہی ہر ایک جا جا

اگر جاتا ہے اے میرے مسیحا

علاج اس درد دل کا تو بتا جا

مری سینہ پہ رکھ دست نگاریں

مری یہ آگ دل کی تو بجھا جا

اگر بیٹھا ہے ناصح منہ کو سی بیٹھ

وگرنہ یاں سے اٹھ اے بے حیا جا

تری نوبت ہی احساںؔ کوئی دن یاں

تو ڈنکا عشق کا ہر جا بجا جا