تو بے نقاب ہے اے مہ یہ ہیں شراب کے دن

تو بے نقاب ہے اے مہ یہ ہیں شراب کے دن

کہ ماہتاب کی راتیں ہیں آفتاب کے دن

جوان تو بھی ہے اپنے بھی ہیں شباب کے دن

بلا حساب دے بوسے نہیں حساب کے دن

ہوا سفید تری انتظار میں آخر

عجب طرح سے پھرے دیدۂ پر آب کے دن

ترے لبوں سے ہے روکش عجب طرح کے ہیں مست

لگے ہیں دن اسے کیوں کر پھریں شراب کے دن

قرار یہ تھا کہ اتوار کے دن آؤں گا

کہا تھا میں نے گئے میرے اضطراب کے دن

ہوا دو چند الم آہ روز یک شنبہ

وہ آفتاب مرا آیا آفتاب کے دن

وہ زلف مجھ پہ ہے بے وجہ رات دن برہم

کسی طرح سے نہ بڑھتی نہیں عتاب کے دن

جگر سے شعلے نکلتے ہیں چشم سے آنسو

اس آب و تاب سے کٹتے پیچ و تاب کے دن

نہ جاؤ شیخ جی آؤ قریب ہے ہولی

خفا نہ ہو کہ چلے آتے ہیں خطاب کے دن

پلائی مے رمضاں میں نہ مجھ کو اے ساقی

بڑے عذاب سے کٹتے ہیں یہ ثواب کے دن

عذاب ہجر بھی دوزخ سے کم نہیں احساںؔ

الٰہی مجھ کو نہ دکھلائیو عذاب کے دن

tu be naqab hai ai mah ye hain sharab ke din

ke mahtab ki raten hain aftab ke din

jawan tu bhi hai apne bhi hain shabab ke din

bala hisab de bose nahin hisab ke din

hawa safed tiri intizar mein akhir

ajab tarah se phire dida-e-pur ab ke din

tire labon se hai rukash ajab tarah ke hain mast

lage hain din use kyun kar phiren sharab ke din

qarar ye tha ke itwar ke din aunga

kaha tha main ne gae mere iztirab ke din

hawa do chand alam ah roz yak shamba

wo aftab mira aya aftab ke din

wo zulf mujh pe hai be wajh rat din barham

kisi tarah se na barhti nahin itab ke din

jigar se shole nikalte hain chashm se ansu

is ab-o-tab se katte pech-o-tab ke din

na jao shaikh ji ao qarib hai holi

khafa na ho ke chale ate hain khitab ke din

pilai mai ramzan mein na mujh ko ai saqi

bare azab se katte hain ye sawab ke din

azab-e-hijr bhi dozakh se kam nahin ehsan

ilahi mujh ko na dukhlaiyo azab ke din