تو مری جان گر نہیں آتی — میر اثر

Arooz is now on the App Store, for iPhone and iPad. Download →

تو مری جان گر نہیں آتی

زیست ہوتی نظر نہیں آتی

دل ربائی و دلبری تجھ کو

گو کہ آتی ہے پر نہیں آتی

حال دل مثل شمع روشن ہے

گو مجھے بات کر نہیں آتی

ہر دم آتی ہے گرچہ آہ پر آہ

پر کوئی کارگر نہیں آتی

کیا کہوں آہ میں کسو کے حضور

نیند کس بات پر نہیں آتی

نہیں معلوم دل پہ کیا گزری

ان دنوں کچھ خبر نہیں آتی

کیجے نا مہربانی ہی آ کر

مہربانی اگر نہیں آتی

دن کٹا جس طرح کٹا لیکن

رات کٹتی نظر نہیں آتی

ظاہراً کچھ سوائے مہر و وفا

بات تجھ کو اثرؔ نہیں آتی