تمہارا عشق جب سے کیا ہوا اے نازنیں ہم کو

تمہارا عشق جب سے کیا ہوا اے نازنیں ہم کو

پسند آتا نہیں ہے کوئی بھی اب مہ جبیں ہم کو

کیا اظہار جب ہم نے غم فرقت تو وہ بولے

تمہارے کہنے کا ہوتا نہیں ہے کچھ یقیں ہم کو

پس مردن پئے پامال گورستاں میں پھرتے ہیں

نشان تربت عشاق مل جائے کہیں ہم کو

بتان سنگ دل سے کیا ہو امید وفا اے دل

جہاں میں ڈھونڈ بیٹھے کچھ پتہ ملتا نہیں ہم کو

نہ جائیں مر کے وہ ہیں عاشق جانباز اے ہمدم

ترے کوچے میں گر مل جائے تھوڑی سی زمیں ہم کو

ترے در پر کھڑے ہیں دید کو ہم ایک مدت سے

دکھا دے شکل نورانی اب اے پردہ نشیں ہم کو

عزیزؔ زار گر عشق بتاں میں یہ رہی صورت

کسی دن مار ڈالے گا دل اندوہ گیں ہم کو

tumhara ishq jab se kya hua ai naznin ham ko

pasand ata nahin hai koi bhi ab mah jabin ham ko

kiya izhar jab ham ne gham-e-furqat to wo bole

tumhare kahne ka hota nahin hai kuchh yaqin ham ko

pas murdan piye pamal gorsitan mein phirte hain

nishan-e-turbat-e-ushshaq mil jae kahin ham ko

butan-e-sang dil se kya ho ummid-e-wafa ai dil

jahan mein dhund baithe kuchh pata milta nahin ham ko

na jaen mar ke wo hain ashiq-e-janbaz ai hamdam

tire kuche mein gar mil jae thori si zamin ham ko

tire dar par khare hain did ko ham ek muddat se

dikha de shakl-e-nurani ab ai parda nashin ham ko

aziz zar gar ishq-e-butan mein ye rahi surat

kisi din mar dalega dil-e-andoh-e-gin ham ko