تمہیں ہاں کسی سے محبت کہاں ہے

تمہیں ہاں کسی سے محبت کہاں ہے

ذرا دیکھیے تو وہ صورت کہاں ہے

بھلا اب کسی سے سنو بات کیا تم

تمہیں اپنی باتوں سے فرصت کہاں ہے

ہر اک بات پر روئے سے دیتے ہو اب

وہ شوخی کہاں وہ شرارت کہاں ہے

پڑے رہتے ہو پہروں ہی منہ لپیٹے

وہ جلسہ کہاں ہے وہ صحبت کہاں ہے

کوئی کچھ کہے اب تمہیں کچھ نہ بولو

وہ تیزی کہاں وہ ظرافت کہاں ہے

وہ لگ چلنا ہر اک سے آفت تمہارا

وہ تندی وہ شوخی وہ فرحت کہاں ہے

کوئی جانتا بھی نہیں اب تو تم کو

وہ پہلی سی خوشبو میں شہرت کہاں ہے

تمہیں دیکھو اور غیر کی باتیں سننا

وہ شان اب کہاں ہے وہ شوکت کہاں ہے

تمہیں ہو عدو ہی کا ملنا مبارک

عدو کی سی ہم میں لیاقت کہاں ہے

نظامؔ آپ ہی آپ آئے گا یاں پر

یہاں رشک سہنے کی طاقت کہاں ہے

tumhen han kisi se mohabbat kahan hai

zara dekhiye to wo surat kahan hai

bhala ab kisi se suno bat kya tum

tumhen apni baton se fursat kahan hai

har ik bat par roe se dete ho ab

wo shokhi kahan wo shararat kahan hai

pare rahte ho pahron hi munh lapete

wo jalsa kahan hai wo sohbat kahan hai

koi kuchh kahe ab tumhen kuchh na bolo

wo tezi kahan wo zarafat kahan hai

wo lag chalna har ik se afat tumhara

wo tundi wo shokhi wo farhat kahan hai

koi janta bhi nahin ab to tum ko

wo pahli si khushbu mein shohrat kahan hai

tumhen dekho aur ghair ki baten sunna

wo shan ab kahan hai wo shaukat kahan hai

tumhen ho adu hi ka milna mubarak

adu ki si ham mein liyaqat kahan hai

nizam ap hi ap aega yan par

yahan rashk sahne ki taqat kahan hai