تمہارے دیکھنے کو حسرت حیرت فزا ٹھہری

تمہارے دیکھنے کو حسرت حیرت فزا ٹھہری

دل محزوں سے نکلی دیدۂ بسمل میں آ ٹھہری

تصور یار کا تھا سامنے آتی قضا کیوں کر

سر بالیں دم مردن بشکل دل ربا ٹھہری

جھکایا بار عصیاں نے ہمارے دست حسرت کو

پہنچ کر تا بلب جس کی ندامت سے دعا ٹھہری

تمہاری جنبش ابرو سے گھائل ہو گئے عاشق

بن آئی جان پر ان کی تمہاری اک ادا ٹھہری

اسی انداز نے ویراں کیا ہے میرے پہلو کو

دل عاشق کے لینے کو ان آنکھوں میں ضیا ٹھہری

صبا کے تیز جھونکوں نے پھرایا در بدر اس کو

زمیں پر چین سے کس دم یہ خاک مبتلا ٹھہری

جلایا مسکرا کر اور ادا سے کر دیا مردہ

کہیں تو یہ جفا ٹھہری کسی جا پر وفا ٹھہری

بسان خون دل چسپاں ہوئی ہے تیرے تلووں سے

ہماری دشمن جاں اب یہ شوخئ ضیا ٹھہری

الٰہی کیا مرے دلبر نے کھولا اپنے گیسو کو

مشام جاں میں اپنے آ کے بوئے جاں فزا ٹھہری

تمہاری بد دعا سے لطف ملتا ہے مرے دل کو

میں عاشق ہوں تمہارا وہ مرے حق میں دعا ٹھہری

فرشتوں نے پکارا اے جمیلہؔ جلد حاضر ہو

خدا کے روبرو آ کر صف اہل صفا ٹھہری

tumhare dekhne ko hasrat-e-hairat faza thahri

dil-e-mahzon se nikli dida-e-bismil mein a thahri

tasawwur yar ka tha samne ati qaza kyun kar

sar-e-balin dam-e-murdan bashkal dil ruba thahri

jhukaya bar-e-isyan ne hamare dast-e-hasrat ko

pahunch kar ta balb jis ki nadamat se dua thahri

tumhari jumbish-e-abru se ghayal ho gae ashiq

ban ai jan par un ki tumhari ik ada thahri

isi andaz ne wiran kiya hai mere pahlu ko

dil-e-ashiq ke lene ko in ankhon mein ziya thahri

saba ke tez jhonkon ne pharaya dar badar us ko

zamin par chain se kis dam ye khak mubtala thahri

jalaya muskura kar aur ada se kar diya murda

kahin to ye jafa thahri kisi ja par wafa thahri

basan-e-khun-e-dil chaspan hui hai tere talwon se

hamari dushman-e-jan ab ye shokhi-e-ziya thahri

ilahi kya mire dilbar ne khola apne gesu ko

masham-e-jan main apne a ke bu-e-jan faza thahri

tumhari bad dua se lutf milta hai mire dil ko

main ashiq hun tumhara wo mire haq mein dua thahri

farishton ne pukara ai jamilahu jald hazir ho

khuda ke rubaru a kar saf-e-ahl-e-safa thahri