تمہارے دید کی حسرت بہت مشکل سے نکلے گی
جمیلہ خدا بخشتمہارے دید کی حسرت بہت مشکل سے نکلے گی
دعا بن کر شب غم وہ ہمارے دل سے نکلے گی
خبر کیا تھی کہ تیری کج ادائی سے بت رعنا
بسان شمع رو کر آرزو محفل سے نکلے گی
تمنا رفتہ رفتہ رنگ کچھ دکھلائے گی اپنا
بنے گی نور جاں اور دیدۂ کامل سے نکلے گی
بسان نکہت گل چھپ نہیں سکتی چھپانے سے
یہ بوئے خون عاشق دامن قاتل سے نکلے گی
نہاں کیا خاک ہوگی حسرت دیدار عاشق کی
وہ اک دن یاس بن کر دیدۂ بسمل سے نکلے گی
دکھائے گی محبت ایک دن ان کو اثر اپنا
سمائی دل میں جو ان کے وہ میرے دل سے نکلے گی
تصور جانب دل چاہیے مجنوں تجھے کرنا
تو جس لیلیٰ کا عاشق ہے وہ اس محمل سے نکلے گی
ٹھہر جا ناقۂ دلبر کہ میں چوموں قدم تیرے
صدا یہ مشت خاک عاشق بیدل سے نکلے گی
زباں سے نالہ و فریاد کرنا ہے عبث تیرا
جمیلہؔ وہ دعا کام آئے گی جو دل سے نکلے گی
tumhare did ki hasrat bahut mushkil se niklegi
dua ban kar shab-e-gham wo hamare dil se niklegi
khabar kya thi ke teri kaj adai se but-e-raana
basan-e-shama ro kar arzu mahfil se niklegi
tamanna rafta rafta rang kuchh dikhlaegi apna
banegi nur-e-jan aur dida-e-kamil se niklegi
basan-e-nikhat-e-gul chhup nahin sakti chhupane se
ye bu-e-khun-e-ashiq daman-e-qatil se niklegi
nihan kya khak hogi hasrat-e-didar ashiq ki
wo ik din yas ban kar dida-e-bismil se niklegi
dikhaegi mohabbat ek din un ko asar apna
samai dil mein jo un ke wo mere dil se niklegi
tasawwur janib-e-dil chahiye majnun tujhe karna
tu jis laila ka ashiq hai wo is mahmil se niklegi
thahar ja naqa-e-dilbar ke main chumun qadam tere
sada ye musht-e-khak-e-ashiq-e-bedil se niklegi
zaban se nala-o-fariyad karna hai abas tera
jamilahu wo dua kam aegi jo dil se niklegi