تمہارے گھر سے پس مرگ کس کے گھر جاتا

تمہارے گھر سے پس مرگ کس کے گھر جاتا

بتاؤ آپ سے جاتا تو میں کدھر جاتا

نہیں ہے کوئی بھی ساتھی تمہارے مجرم کا

پکار اٹھتے سب اعضا جو میں مکر جاتا

اجل کے بھیس میں میری تلاش کر لیتے

وہ آپ ڈھونڈ کے خود لاتے میں جدھر جاتا

تکلفات محبت نے قید کر رکھا

ہر ایک سمت تھی دیوار میں کدھر جاتا

کبھی نہ سامنے آتا ذلیل کہلا کر

جو وہ بلاتے تو میں اپنے نام پر جاتا

بھلا چھپائے سے چھپتا لہو شہیدوں کا

یہ خون بول ہی اٹھتا جو تو مکر جاتا

tumhare ghar se pas-e-marg kis ke ghar jata

batao ap se jata to main kidhar jata

nahin hai koi bhi sathi tumhare mujrim ka

pukar uthte sab aaza jo main makar jata

ajal ke bhes mein meri talash kar lete

wo ap dhund ke khud late mein jidhar jata

takallufat mohabbat ne qaid kar rakha

har ek samt thi diwar mein kidhar jata

kabhi na samne ata zalil kahla kar

jo wo bulate to main apne nam par jata

bhala chhupae se chhupta lahu shahidon ka

ye khun bol hi uthta jo tu makar jata