تن سے جاں کا قدم نکلتا ہے — میر کلو عرش

Arooz is now on the App Store, for iPhone and iPad. Download →

میر کلو عرش

تن سے جاں کا قدم نکلتا ہے

اب کوئی دم میں دم نکلتا ہے

سیر کر انقلاب عالم کی

ٹھیکرا لے کے جم نکلتا ہے

اے پری شب جو حور کو دیکھا

تیرا انداز کم نکلتا ہے

خلق مرتی ہے کوئے قاتل میں

طور ملک عدم نکلتا ہے

چھوڑ بت خانے کو ترے ہاتھوں

برہمن اے صنم نکلتا ہے

کوچۂ زلف سے ترے اے بت

بچ کے شیخ حرم نکلتا ہے

صاف اے حور تیرے کوچے میں

رنگ باغ ارم نکلتا ہے

جان جاں تجھ پہ جان جاتی ہے

دم نکلتا ہے دم نکلتا ہے

تیغ قاتل ہے عرشؔ زہر آلود

میرے زخموں سے سم نکلتا ہے