تمہاری شرط محبت کبھی وفا نہ ہوئی

تمہاری شرط محبت کبھی وفا نہ ہوئی

یہ کیا ہوئی تمہیں کہہ دو اگر جفا نہ ہوئی

قدم قدم پہ قدم لڑکھڑائے جاتے تھے

تمام عمر بھی طے منزل وفا نہ ہوئی

تمہیں کہو تمہیں ناآشنا کہیں نہ کہیں

کہ آشنا سے ادا رسم آشنا نہ ہوئی

تری ادا کی قسم ہے تری ادا کے سوا

پسند اور کسی کی ہمیں ادا نہ ہوئی

ہمیں کو دیکھ کے خنجر نکالتے تھے آپ

ہمارے بعد تو یہ رسم پھر ادا نہ ہوئی

خدا نے رکھ لیا ناز و نیاز کا پردہ

کہ روز حشر مری ان کی برملا نہ ہوئی

tumhari shart-e-mohabbat kabhi wafa na hui

ye kya hui tumhen kah do agar jafa na hui

qadam qadam pe qadam larkharae jate the

tamam umr bhi tai manzil-e-wafa na hui

tumhen kaho tumhen naashna kahin na kahin

ke ashna se ada rasm-e-ashna na hui

tiri ada ki qasam hai tiri ada ke siwa

pasand aur kisi ki hamen ada na hui

hamen ko dekh ke khanjar nikalte the ap

hamare baad to ye rasm phir ada na hui

khuda ne rakh liya naz-o-niyaz ka parda

ke roz-e-hashr miri un ki barmala na hui