تمہاری چشم نے مجھ سا نہ پایا

تمہاری چشم نے مجھ سا نہ پایا

دیا سرمہ بھی اور چپکا نہ پایا

خدا کو کیا کہوں پایا نہ پایا

کہ وصل بے خودی اصلا نہ پایا

بہت صورت کو میں ترسا نہ پایا

نہ پایا وہ بہت ترسا نہ پایا

سحاب تر نے بحر خشک سب نے

ہمارا دیدۂ تر سا نہ پایا

چلے ہم دل جلے اس بزم سے یار

جلے ہاتھوں سے اک بیڑا نہ پایا

سدا سورج نے دن بھر اس کو ڈھونڈا

کبھی وہ چاند کا ٹکڑا نہ پایا

بہت اچھا ہوا اچھی ہے قسمت

مریض عشق کو اچھا نہ پایا

جو اس گردن کا نقشہ ہے وہ ہم نے

صراحی دار موتی کا نہ پایا

در اشک مسلسل اے شہ عشق

تری دولت سے یہ سہرا نہ پایا

بہت سیدھا بناؤں گا فلک کو

کہ اس کج کو کبھی سیدھا نہ پایا

tumhari chashm ne mujh sa na paya

diya surma bhi aur chipka na paya

khuda ko kya kahun paya na paya

ke wasl-e-be khudi aslan na paya

bahut surat ko main tarsa na paya

na paya wo bahut tarsa na paya

sahab tar ne bahr-e-khushk sab ne

hamara dida-e-tar sa na paya

chale ham dil jale is bazm se yar

jale hathon se ik bera na paya

sada suraj ne din bhar us ko dhunda

kabhi wo chand ka tukra na paya

bahut achchha hua achchhi hai qismat

mariz-e-ishq ko achchha na paya

jo is gardan ka naqsha hai wo ham ne

surahi dar moti ka na paya

dar-e-ashk-e-musalsal ai shah ishq

tiri daulat se ye sehra na paya

bahut sidha banaunga falak ko

ke is kaj ko kabhi sidha na paya