تن میں دم روک میں بہ دیر رکھا

تن میں دم روک میں بہ دیر رکھا

آؤ جی کس نے تم کو گھیر رکھا

ہم گئے واں تو یاں وہ آیا واہ

خوب قسمت نے ہیر پھیر رکھا

کر گیا وہ ہی راہ عشق کو طے

یاں قدم جس نے ہو دلیر رکھا

سب کو عاجز کیا فلک نے پر ایک

آہوئے دل پہ غم کو شیر رکھا

جا کے بیٹھے جو کوئے یار میں ہم

واں سے باہر قدم نہ پھیر رکھا

بعد مدت وہ دیکھ کر بولا

کس نے یاں خاک کا یہ ڈھیر رکھا

شکر اے درد عشق تو نے سدا

زندگانی سے ہم کو سیر رکھا

کیسا گھبرا گیا وہ کل ہم نے

ٹک جو رستے میں اس کو گھیر رکھا

خیر ہو یا الٰہی جرأتؔ نے

عاشقی میں قدم کو پھیر رکھا

tan mein dam rok mein ba der rakha

ao ji kis ne tum ko gher rakha

ham gae wan to yan wo aya wah

khub qismat ne hir pher rakha

kar gaya wo hi rah-e-ishq ko tai

yan qadam jis ne ho diler rakha

sab ko ajiz kiya falak ne par ek

ahu-e-dil pe gham ko sher rakha

ja ke baithe jo ku-e-yar mein ham

wan se bahar qadam na pher rakha

baad muddat wo dekh kar bola

kis ne yan khak ka ye dher rakha

shukr ai dard-e-ishq tu ne sada

zindagani se ham ko sair rakha

kaisa ghabra gaya wo kal ham ne

tuk jo raste mein us ko gher rakha

khair ho ya ilahi jurat ne

ashiqi mein qadam ko pher rakha