تم پر میں لاکھ جان سے قربان یا رسول

تم پر میں لاکھ جان سے قربان یا رسول

بر آئیں میرے دل کے بھی ارمان یا رسول

کیوں دل پہ میں فدا نہ کروں جان یا رسول

رہتے ہیں اس میں آپ کے ارمان یا رسول

رحمت دکھائے حشر میں وہ شان یا رسول

شرمندہ ہوکے ہوں میں پشیمان یا رسول

کشتہ ہوں روئے پاک کا نکلوں جو قبر سے

جاری مری زباں پہ ہو قرآن یا رسول

جس دم کہ دم بدن سے نکلنے لگے مرا

اس دم نہ ہوں حواس پریشان یا رسول

میں گھر گیا ہوں فوجِ معاصی میں المدد

کوئی نہیں نجات کا سامان یا رسول

محشر میں دست بستہ کہوں گا حضور سے

جی بھر کے نکلیں آج تو ارمان یا رسول

بلوائیے مدینے میں جائے یہ تفرقہ

اب ہند میں بہت ہوں پریشان یا رسول

سختیِ نزع تنگیِ گور و حسابِ حشر

یہ منزلیں کڑی نہوں سب آسان یا رسول

دنیا سے اور کچھ نہیں مطلوب ہے مجھے

لے جاؤں اپنے ساتھ میں ایمان یا رسول

کیا پیاری پیاری باتیں تھیں اصحابِ پاک کی

لائے تھے جب سے آپ پر ایمان یا رسول

ہنگامِ عرض کرتے تھے ہاتھوں کو جوڑ کر

ماں باپ سب ہیں آپ پہ قربان یا رسول

میں بھی تو ہوں غلام اسی در کا حکم ہو

روکیں نہ مجھ کو آپ کے دربان یا رسول

خوانِ عطا سے مجھ کو بھی ہوں نعمتیں عطا

سرکار میزباں ہیں میں مہمان یا رسول

اولاد میں مری برکت کا ظہور ہو

آباد گھر مرا نہ ہو ویران یا رسول

اس شوق میں کہ آپ کے دامن سے جا ملے

میں چاک کر رہا ہوں گریبان یا رسول

اب انبیا کی شان زمانے سے ہے بلند

ان سب سے برتر آپکی ہے شان یا رسول

کافی ہے یہ وسیلہ شفاعت کے واسطے

عاصی تو ہوں مگر ہوں پشیمان یا رسول

اس چاک میں مجھے درِ جنت نظر پڑے

وحشت میں چاک ہو جو گریبان یا رسول

حیرت زدہ ہے آنکھ تو رخسار دیکھ کر

دل کیوں ہے شکلِ آئینہِ حیران یا رسول

مشکل کشا ہیں آپ امیؔر آپ کا غلام

اب اس کی مشکلیں بھی ہوں آسان یا رسول

tum par main lakh jan se qurban ya rasul

bar aen mere dil ke bhi arman ya rasul

kyun dil pe main fida na karun jan ya rasul

rahte hain is mein ap ke arman ya rasul

rahmat dikhae hashr mein wo shan ya rasul

sharminda hoke hun main pasheman ya rasul

kushta hun ru-e-pak ka niklun jo qabr se

jari miri zaban pe ho quran ya rasul

jis dam ke dam badan se nikalne lage mira

is dam na hun hawas pareshan ya rasul

main ghar gaya hun fauj-e-maasi mein almadad

koi nahin najat ka saman ya rasul

mahshar mein dast-e-basta kahunga huzur se

ji bhar ke niklen aj to arman ya rasul

balwaye madine mein jae ye tafriqa

ab hind mein bahut hun pareshan ya rasul

sakhti-e-nazaa tangi-e-gor-o-hisab-e-hashr

ye manzilen kari nahun sab asan ya rasul

duniya se aur kuchh nahin matlub hai mujhe

le jaun apne sath mein iman ya rasul

kya pyari pyari baten thin ashab-e-pak ki

lae the jab se ap par iman ya rasul

hangam-e-arz karte the hathon ko jor kar

man bap sab hain ap pe qurban ya rasul

main bhi to hun ghulam usi dar ka hukm ho

roken na mujh ko ap ke darban ya rasul

khwan-e-ata se mujh ko bhi hun nematen ata

sarkar mezban hain main mehman ya rasul

aulad mein miri barkat ka zuhur ho

abad ghar mira na ho wiran ya rasul

is shauq mein ke ap ke daman se ja mile

main chak kar raha hun gareban ya rasul

ab ambiya ki shan zamane se hai buland

un sab se bartar apki hai shan ya rasul

kafi hai ye wasila shafaat ke waste

asi to hun magar hun pasheman ya rasul

is chak mein mujhe dar-e-jannat nazar pare

wahshat mein chak ho jo gareban ya rasul

hairat zada hai ankh to rukhsar dekh kar

dil kyun hai shakl-e-aina-e-hairan ya rasul

mushkil kusha hain ap amir ap ka ghulam

ab us ki mushkilen bhi hun asan ya rasul