تم جو کہتے ہو کہ آویں گے ترے ہاں کل تک

تم جو کہتے ہو کہ آویں گے ترے ہاں کل تک

کون جیتا ہے جدائی میں مری جاں کل تک

تیرے وحشی کا اگر خاک اڑانا ہے یہی

کہیں ڈھونڈا بھی نہ پاوے گا بیاباں کل تک

کچھ بھی کہتے ہیں جراحت کی میرے اے ہمدم

اکتفا کیونکہ کرے ایک نمکداں کل تک

دور سے گر اسے تصویر دکھا دوں تیری

آپ میں آوے نہ پھر شاہد کنعاں کل تک

خاک میں آج وہ سر ٹھوکریں کھاتے ہیں پڑے

جو امارت کا کیا کرتے تھے ساماں کل تک

دل لگاتی ہے عبث اپنے لیے اے بلبل

ڈھونڈے پاوے گی نہ گل ہائے گلستاں کل تک

کیا نظر کام کرے اس کے دہن پر عارفؔ

لاکھ دیکھا کرے یہ دیدۂ حیراں کل تک

tum jo kahte ho ke awenge tire han kal tak

kaun jita hai judai mein miri jan kal tak

tere wahshi ka agar khak urana hai yahi

kahin dhunda bhi na pawega bayaban kal tak

kuchh bhi kahte hain jarahat ki mere ai hamdam

iktifa kyunke kare ek namakdan kal tak

dur se gar use taswir dikha dun teri

ap mein awe na phir shahid-e-kanan kal tak

khak mein aj wo sar thokaren khate hain pare

jo amarat ka kiya karte the saman kal tak

dil lagati hai abas apne liye ai bulbul

dhunde pawegi na gul ha-e-gulistan kal tak

kya nazar kam kare us ke dahan par arif

lakh dekha kare ye dida-e-hairan kal tak