تم کب تھے قریب اتنے میں کب دور رہا ہوں — باقی صدیقی

Arooz is now on the App Store, for iPhone and iPad. Download →

باقی صدیقی

تم کب تھے قریب اتنے میں کب دور رہا ہوں

چھوڑو نہ کرو بات کہ میں تم سے خفا ہوں

رہنے دو کہ اب تم بھی مجھے پڑھ نہ سکو گے

برسات میں کاغذ کی طرح بھیگ گیا ہوں

سو بار گرہ دے کے کسی آس نے جوڑا

سو بار میں دھاگے کی طرح ٹوٹ چکا ہوں

جائے گا جہاں تو مری آواز سنے گا

میں چور کی مانند ترے دل میں چھپا ہوں

اک نقطے پہ آ کر بھی ہم آہنگ نہیں ہیں

تو اپنا فسانہ ہے تو میں اپنی صدا ہوں

چھیڑو نہ ابھی شاخ شکستہ کا فسانہ

ٹھہرو میں ابھی رقص صبا دیکھ رہا ہوں

منزل کا پتا جس نے دیا تھا مجھے باقیؔ

اس شخص سے رستے میں کئی بار ملا ہوں