تم ہجر کے جھگڑوں کو مٹا کیوں نہیں دیتے

تم ہجر کے جھگڑوں کو مٹا کیوں نہیں دیتے

بگڑی ہوئی تقدیر بنا کیوں نہیں دیتے

درد دل بیتاب گھٹا کیوں نہیں دیتے

محفل سے رقیبوں کو اٹھا کیوں نہیں دیتے

کیوں ہے خفگی کس لئے ماتھے پہ شکن ہے

تقصیر مری آپ بتا کیوں نہیں دیتے

تم سے جو کیا کرتے ہیں ہر وقت دغائیں

اے حضرت دل ان کو دعا کیوں نہیں دیتے

مجبور ہوں میں کشمکش رنج و الم میں

تم آ کے مری جان چھڑا کیوں نہیں دیتے

تنگ آئے ہیں ہمسایہ جو فریاد سے میری

اس شوخ فسوں گر کو بلا کیوں نہیں دیتے

اک بوسۂ رخسار کا مدت سے ہوں سائل

ہیں آپ اگر اہل سخا کیوں نہیں دیتے

وہ پوچھتے پھرتے ہیں کہ میں کس کو مٹاؤں

تربت کو مری لوگ بتا کیوں نہیں دیتے

مرتا ہوں میں تم پر جو کہا ان سے تو بولے

یہ سچ ہے تو پھر مر کے دکھا کیوں نہیں دیتے

وہ تذکرۂ صدمۂ ہجراں پہ شب وصل

بولے کہ اسے دل سے بھلا کیوں نہیں دیتے

جب میں نے کہا تم سے حسیں اور بہت ہیں

کس ناز سے بولے کہ دکھا کیوں نہیں دیتے

کیوں قتل کی پرسش پہ سر حشر ہو خاموش

الزام رقیبوں پہ لگا کیوں نہیں دیتے

ہے نشترؔ ناشاد جھکائے ہوئے سر کو

تم جوہر شمشیر دکھا کیوں نہیں دیتے

tum hijr ke jhagron ko mita kyun nahin dete

bigri hui taqdir bana kyun nahin dete

dard-e-dil betab ghata kyun nahin dete

mahfil se raqibon ko utha kyun nahin dete

kyun hai khafagi kis liye mathe pe shikan hai

taqsir miri ap bata kyun nahin dete

tum se jo kiya karte hain har waqt daghaen

ai hazrat-e-dil un ko dua kyun nahin dete

majbur hun main kashmakash-e-ranj-o-alam mein

tum a ke miri jan chhura kyun nahin dete

tang ae hain hamsaya jo fariyad se meri

us shokh fusun gar ko bala kyun nahin dete

ik bosa-e-rukhsar ka muddat se hun sail

hain ap agar ahl-e-sakha kyun nahin dete

wo puchhte phirte hain ke main kis ko mitaun

turbat ko miri log bata kyun nahin dete

marta hun main tum par jo kaha un se to bole

ye sach hai to phir mar ke dikha kyun nahin dete

wo tazkira-e-sadma-e-hijran pe shab-e-wasl

bole ke use dil se bhala kyun nahin dete

jab main ne kaha tum se hasin aur bahut hain

kis naz se bole ke dikha kyun nahin dete

kyun qatl ki pursish pe sar hashr ho khamosh

ilzam raqibon pe laga kyun nahin dete

hai nashtar nashad jhukae hue sar ko

tum jauhar-e-shamshir dikha kyun nahin dete