تم عزیز اور تمہارا غم بھی عزیز — ہادی مچھلی شہری (Hadi Machlishahri)

تم عزیز اور تمہارا غم بھی عزیز

کس سے کس کا گلا کرے کوئی

مانع عرض مجھ کو پاس وفا

ان کو ضد التجا کرے کوئی

تم تغافل شعار دل مایوس

آہ کیا حوصلہ کرے کوئی

غم دل اب کسی کے بس کا نہیں

کیا دوا کیا دعا کرے کوئی

کون سنتا ہے غم نصیبوں کی

کس کے در پر صدا کرے کوئی

خیر سن لو مرا فسانۂ غم

یہ تو کہہ دوگے کیا کرے کوئی

سخت مشکل ہے شرح درد نہاں

کس طرح ابتدا کرے کوئی

جس کو دیکھو وہ ہے وفا دشمن

کس سے عہد وفا کرے کوئی

ختم جور و جفا ہے مرگ وفا

کاش پھر ابتدا کرے کوئی

لطف تعزیر جب ہو جان حیات

کیوں نہ ہادیؔ خطا کرے کوئی