تم ہو بزم عیش ہے واں اور صحبت داریاں

تم ہو بزم عیش ہے واں اور صحبت داریاں

ہم ہیں کنج غم ہے یاں اور جان سے بیزاریاں

تم کو سیر باغ و گلگشت چمن کا واں ہے شوق

یاں بدن پر ہیں ہجوم داغ سے گل کاریاں

دھیان ہے آرائش زلف پریشاں کا تمہیں

یاد ہیں حال پریشاں کی مری کچھ خواریاں

تم صفائے ساعد و بازو دکھاتے ہو وہاں

ہم پہ یاں موئے بدن کرتے ہیں نشتر داریاں

تم نے دکھلائی وہاں پیٹھ اور چوٹی کی پھبن

یاں مری چھاتی پہ ہیں کالے نے لہریں ماریاں

نیک و بد دونوں سے یاں ہم نے تو آنکھیں موند لیں

تم وہاں چتون کی دکھلاتے ہو جادو کاریاں

یاں برنگ پیکر تصویر ہم خاموش ہیں

گفتگو کی تم دکھاتے ہو وہاں طراریاں

قہقہے تم مارتے ہو واں بآواز بلند

دشمنوں سے یاں چھپا کر ہم ہیں کرتے زاریاں

ہر مریض غم کی جاں بخشی کا ہے واں تم کو دھیان

کھنچ گئیں یاں طول شدت سے مری بیماریاں

اضطراب دل سے بے پردہ ہوا یاں راز عشق

سوجھتی ہیں واں تمہیں ہر بات میں تہداریاں

کیا کسی سے بات کیجے بھولتے اک دم نہیں

ان بھلاؤں سے وہ باتوں میں تری عیاریاں

چھین کر باتوں میں دل کو لطفؔ سے وہ بت بنے

یاد رکھنا غیر کی کرنا وہاں دال داریاں

tum ho bazm-e-aish hai wan aur sohbat dariyan

ham hain kunj-e-gham hai yan aur jan se bezariyan

tum ko sair-e-bagh-o-gulgasht-e-chaman ka wan hai shauq

yan badan par hain hujum-e-dagh se gul kariyan

dhyan hai araish-e-zulf-e-pareshan ka tumhen

yad hain hal-e-pareshan ki miri kuchh khwariyan

tum safa-e-said-o-bazu dikhate ho wahan

ham pe yan mu-e-badan karte hain nashtar dariyan

tum ne dikhlai wahan pith aur choti ki phaban

yan miri chhati pe hain kale ne lahren mariyan

nek-o-bad donon se yan ham ne to ankhen mund len

tum wahan chitwan ki dikhlate ho jadu kariyan

yan barang-e-paikar-e-taswir ham khamosh hain

guftugu ki tum dikhate ho wahan tarrariyan

qahqahe tum marte ho wan baawaz-e-buland

dushmanon se yan chhupa kar ham hain karte zariyan

har mariz-e-gham ki jan bakhshi ka hai wan tum ko dhyan

khinch gain yan tul-e-shiddat se miri bimariyan

iztirab-e-dil se be parda hua yan raz-e-ishq

sujhti hain wan tumhen har bat mein tahdariyan

kya kisi se bat kije bhulte ik dam nahin

un bhulaun se wo baton mein tiri ayyariyan

chhin kar baton mein dil ko lutf se wo but bane

yad rakhna ghair ki karna wahan dal dariyan