تم گرم ملے ہم سے نہ سرما کے دنوں میں

تم گرم ملے ہم سے نہ سرما کے دنوں میں

پیش آئے بہ گرمی بھی تو گرما کے دنوں میں

جب آئی خزاں ہم کو کہا "باغ چلو ہو"

پوچھا نہ کبھی سیر و تماشا کے دنوں میں

نے غرفے سے جھانکا نہ کبھی بام پر آئے

پنہاں رہے تم حسن دل آرا کے دنوں میں

جی ہی میں رکھی اپنے میاں جی سے جو اپجی

کچھ ہم نے کہا تم سے تمنا کے دنوں میں

لکھ لکھ کے اسے یاروں نے دیوان بنایا

کچھ کچھ جو بکا کرتے تھے سودا کے دنوں میں

دل اپنا الجھتا تھا تبھی جن دنوں پیارے

تھی زلف تری طرۂ لیلیٰ کے دنوں میں

مفلس ہوئے اے مصحفیؔ افسوس کہ ہم نے

پیدا نہ کیا یار کو پیدا کے دنوں میں

tum garm mile ham se na sarma ke dinon mein

pesh ae ba garmi bhi to garma ke dinon mein

jab ai khizan ham ko kaha "bagh chalo ho"

puchha na kabhi sair-o-tamasha ke dinon mein

ne ghurfe se jhanka na kabhi bam par ae

pinhan rahe tum husn-e-dil ara ke dinon mein

ji hi mein rakhi apne miyan ji se jo apaji

kuchh ham ne kaha tum se tamanna ke dinon mein

likh likh ke use yaron ne diwan banaya

kuchh kuchh jo buka karte the sauda ke dinon mein

dil apna ulajhta tha tabhi jin dinon pyare

thi zulf tiri turra-e-laila ke dinon mein

muflis hue ai mushafi afsos ke ham ne

paida na kiya yar ko paida ke dinon mein