Arooz is now on the App Store, for iPhone and iPad. Download →

All poetry

تم جانتے ہو کس لئے وہ مجھ سے گیا لڑ

Waliullah Muhib

تم جانتے ہو کس لئے وہ مجھ سے گیا لڑ

اے ہمدم من اس کے کہیں اور لگی لڑ

اس نے شجر دوستی اب دل سے اکھاڑا

کہنے سے رقیبوں کے ہے فتنے کی بندھی جڑ

اس بت کو کہاں پہنچیں بت آذر کے تراشے

ہاتھ اپنے سے تیار کرے جس کو خدا گھڑ

دل دوز نگہ یار کی ہوتی ہے مقابل

برچھی کی انی سی مرے سینے میں گئی گڑ

خجلت سے تو پھر سامنے آنکھیں نہ کرے گا

اے ابر مرے گریہ کی جس وقت لگی جھڑ

خط کا یہ جواب آیا کہ قاصد گیا جی سے

سر ایک طرف لوٹے ہے اور ایک طرف دھڑ

رندوں نے عوض وسمے کے نورا جو لگایا

پاکی کی طرح شیخ کی داڑھی بھی گئی جھڑ

ترچھی نگہ اس کی کہ ہوا کوئی نہ آڑے

سینے کو سپر کر کے رہے ایک ہمیں اڑ

صحرائے جنوں سے محبؔ اس زلف کی زنجیر

پھر پیچ میں لے آئی مجھے پاؤں مرے پڑ