تم غیر سے ملو نہ ملو میں تو چھوڑ دوں
میر تسکین دہلویتم غیر سے ملو نہ ملو میں تو چھوڑ دوں
گر اس وفا پہ کوئی کہے بے وفا مجھے
سچ ہے تو بدگماں ہے سمجھتا ہے کچھ کا کچھ
بوسہ نہ لینا تھا ترے آئینے کا مجھے
انصاف کر خراب نہ پھرتا میں در بدر
ملتی جو تیرے گوشۂ خاطر میں جا مجھے
اس بت کی میں دکھاؤں گا تصویر واعظو
پھر کیا کہے گا داور روز جزا مجھے
کیوں ان سے وقت قتل کیا شکوہ غیر کا
کرنی تھی مغفرت ہی کی اپنی دعا مجھے
پوچھے جو تجھ سے کوئی کہ تسکیںؔ سے کیوں ملا
کہہ دیجو حال دیکھ کے رحم آ گیا مجھے
tum ghair se milo na milo mein to chhor dun
gar is wafa pe koi kahe be wafa mujhe
sach hai to badguman hai samajhta hai kuchh ka kuchh
bosa na lena tha tire aine ka mujhe
insaf kar kharab na phirta main dar badar
milti jo tere gosha-e-khatir mein ja mujhe
us but ki main dikhaunga taswir waizo
phir kya kahega dawar-e-roz-e-jaza mujhe
kyun un se waqt-e-qatl kiya shikwa ghair ka
karni thi maghfirat hi ki apni dua mujhe
puchhe jo tujh se koi ke taskin se kyun mila
kah dijo hal dekh ke rahm a gaya mujhe