تم اگر دو نہ پیرہن اپنا

تم اگر دو نہ پیرہن اپنا

چرخ سے مانگ لوں کفن اپنا

آگے کرتے تھے اس طرح پامال

یاد تو کیجئے چلن اپنا

آج ہم جان دینے آئے ہیں

کچھ دکھاتے ہو بانکپن اپنا

شانہ زلفوں میں واں نہیں الجھا

سانپ دکھلا رہا ہے پھن اپنا

یاد رکھیو ہماری پامالی

بھولیو مت کبھی چلن اپنا

یا کہو ہم کنویں میں ڈوب مریں

یا دکھاؤ کوچۂ ذقن اپنا

ہم وہ بلبل نہیں جو باغ کو جائیں

کوچۂ یار ہے چمن اپنا

ہم کو دکھلا کے تنگ کرتے ہیں

گہ کمر اپنی گہ دہن اپنا

جس کو کہتے ہیں لوگ شہر کڑا

اے سخیؔ ہے وہی وطن اپنا

tum agar do na pairahan apna

charkh se mang lun kafan apna

age karte the is tarah pamal

yad to kijiye chalan apna

aj ham jan dene ae hain

kuchh dikhate ho bankpan apna

shana zulfon mein wan nahin uljha

sanp dikhla raha hai phan apna

yad rakhiyo hamari pamali

bhuliyo mat kabhi chalan apna

ya kaho ham kuen mein dub maren

ya dikhao kucha-e-zaqan apna

ham wo bulbul nahin jo bagh ko jaen

kucha-e-yar hai chaman apna

ham ko dikhla ke tang karte hain

gah kamar apni gah dahan apna

jis ko kahte hain log shahr kara

ai sakhi hai wahi watan apna