تصور ہم نے جب تیرا کیا پیش نظر پایا

تصور ہم نے جب تیرا کیا پیش نظر پایا

تجھے دیکھا جدھر دیکھا تجھے پایا جدھر پایا

کہاں ہم نے نہ اس درد نہانی کا اثر پایا

یہاں اٹھا وہاں چمکا ادھر آیا ادھر پایا

پتا اس نے دیا تیرا ملا جو عشق میں خود گم

خبر تیری اسی سے پائی جس کو بے خبر پایا

دل بے تاب کے پہلو سے جاتے ہی گیا سب کچھ

نہ پائیں سینے میں آہیں نہ آہوں میں اثر پایا

وہ چشم منتظر تھی جس کو دیکھا آ کے وا تم نے

وہ نالہ تھا ہمارا جس کو سوتے رات بھر پایا

میں ہوں وہ ناتواں پنہاں رہا خود آنکھ سے اپنی

ہمیشہ آپ کو گم صورت تار نظر پایا

حبیب اپنا اگر دیکھا تو داغ عشق کو دیکھا

طبیب اپنا اگر پایا تو اک درد جگر پایا

کیا گم ہم نے دل کو جستجو میں داغ حسرت کی

کسی کو پا کے کھو بیٹھے کسی کو ڈھونڈھ کر پایا

بہت سے اشک رنگیں اے جلالؔ اس آنکھ سے ٹپکے

مگر بے رنگ ہی دیکھا نہ کچھ رنگ اثر پایا

tasawwur ham ne jab tera kiya pesh-e-nazar paya

tujhe dekha jidhar dekha tujhe paya jidhar paya

kahan ham ne na is dard-e-nihani ka asar paya

yahan utha wahan chamka idhar aya idhar paya

pata us ne diya tera mila jo ishq mein khud gum

khabar teri usi se pai jis ko be khabar paya

dil-e-be tab ke pahlu se jate hi gaya sab kuchh

na paen sine mein ahen na ahon mein asar paya

wo chashm-e-muntazir thi jis ko dekha a ke wa tum ne

wo nala tha hamara jis ko sote rat bhar paya

main hun wo natawan pinhan raha khud ankh se apni

hamesha ap ko gum surat-e-tar-e-nazar paya

habib apna agar dekha to dagh-e-ishq ko dekha

tabib apna agar paya to ik dard-e-jigar paya

kiya gum ham ne dil ko justuju mein dagh-e-hasrat ki

kisi ko pa ke kho baithe kisi ko dhundh kar paya

bahut se ashk rangin ai jalal is ankh se tapke

magar be rang hi dekha na kuchh rang-e-asar paya