ترے بیمار کی شاید وداع جان ہے تن سے

ترے بیمار کی شاید وداع جان ہے تن سے

جنازے کی وگرنہ واں ہے تیاری کا کیا باعث

کہیں وقت خطاب اے یار اپنے منہ سے نکلا تھا

لگا کہنے کہ مجھ میں آپ میں یاری کا کیا باعث

مریض اپنے کو دیکھا آہ خوں آلودہ کیا کیا تھے

نہ تھا گر درد دل میں نالہ و زاری کا کیا باعث

نہیں کچھ زور سے لیتا کوئی دل دو نہ دو ممنوںؔ

یہ مجبوری کا کیا موجب یہ ناچاری کا کیا باعث

مرے سینہ میں گر آتش کدہ پنہاں نہیں ظالم

فغان و آہ سے ہر دم شررباری کا کیا باعث

تصور چشم خوباں کا مقرر تم کو رہتا ہے

وگرنہ حضرت دل اتنی بیماری کا کیا باعث

ہوا جب کام اپنا کام دل جب پوچھنے آئے

مجھے غم کھا چکا اب میری غم خواری کا کیا باعث

عجب دیوانگی ہے کوئی بھی یوں دل پھنساتا ہے

بہت دانا تھے تم ممنوںؔ گرفتاری کا کیا باعث

tire bimar ki shayad wida-e-jan hai tan se

janaze ki wagarna wan hai tayyari ka kya bais

kahin waqt-e-khitab ai yar apne munh se nikla tha

laga kahne ke mujh mein ap mein yari ka kya bais

mariz apne ko dekha ah khun aluda kya kya the

na tha gar dard-e-dil mein nala-o-zari ka kya bais

nahin kuchh zor se leta koi dil do na do mamnun

ye majburi ka kya mujib ye nachari ka kya bais

mire sina mein gar atish kada pinhan nahin zalim

fughan-o-ah se har dam shararbari ka kya bais

tasawwur chashm-e-khuban ka muqarrar tum ko rahta hai

wagarna hazrat-e-dil itni bimari ka kya bais

hawa jab kam apna kam-e-dil jab puchhne ae

mujhe gham kha chuka ab meri gham khwari ka kya bais

ajab diwangi hai koi bhi yun dil phansita hai

bahut dana the tum mamnun giraftari ka kya bais